Ծաղկաձորում «ունիկալ» գիտաժողով կանցկացվի

Հուլիսի 10-12-ը Ծաղկաձորում տեղի կունենա «Թյուրքական աշխարհ, Կովկաս և Իրան. Քաղաքակրթությունների փոխներգործության խաչմերուկ» խորագրով միջազգային գիտողով: Գիտաժողովի կազմակերպիչներն են «Իրան և Կովկաս» միջազգային պարբերականը, ՀՀ ԳԱԱ Հնագիտության և Ազգագրության ինստիտուտը, «Սոցիոմետր» անկախ սոցիոլոգիական կենտրոնը, «ARMACAD» ասոցիացիան, Իրանալեզու հանրույթների ուսումնասիրության միջազգային ընկերակցությունը և «Պարթև» հայ-թուրքական համագործակցության կենտրոնը:

«Այս գիտաժողովը առաջին անգամ է նման ֆորմատով և նման խորագրով տեղի ունենում: Սա մեր հերթական գիտաժողովն է, սակայն ունիկալ է այն իմաստով, որ ուղղված է հետաքրքիր թեմայի՝ Թյուրքական աշխարհի, Կովկասի և Իրանի, այս երեք առանձին աշխարհագրական, հասարակական-քաղաքական, պատմական, մշակութային շրջանների համագործակցությանը», - լրագրողների հետ հանդիպմանը ասաց ԵՊՀ Իրանագիտության ամբիոնի վարիչ Գառնիկ Ասատրյան:

Նշենք, որ այս գիտաժողովը թվով 7-որդն է, որ անցկացվում է Հայաստանում:

«Թուրքիան և Ադրբեջանը թյուրքական աշխարհի մի մասն է, փոքր մասը: Իսկական թյուրքական մասը գտնվում է Կենտրոնական Ասիայում: Ղազախստանը, Ուզբեկստանը, Թուրքմենստանը, Ղրղզստանը, Թաթարստանը Ռուսաստանի տարածքում, հանդիսանում են թյուրքականության հիմնական կրողը: Այս ամբողջը թյուրքական աշխարհ է կոչվում: Այս կոնֆերանսը դրան է միտված՝ թյուրքական աշխարհի կապը Իրանի և Կովկասի հետ», - տեղեկացրեց բանախոսը:

Գիտաժողովի աշխատանքներին իրենց ներդրումն են ունենալու 21 երկրի մոտ 100 մասնակիցներ՝ ԱՄՆ-ից, Կանադայից, Գերմանիայից, Թուրքիայից, Տաջիկստանից և այլն: Գիտաժողովը նախատեսվում է անցկացնել 2 տարին մեկ անգամ: